أديني أكتر من محاكاة رباعيات جاهين لـ عصام ابراهيم زعرب " قمرين "

سألها ليه يادنيا دايما كدة معانداني؟
وانا اللي ياما غازلتك بشعر وأغاني
تتقلي ع اللي يبوس تراب جزمتك
وتودي اللي مجافيكي ياألف آه ياني
عجبي!!!


عصفور متعود يصحي صاحبه الفلاح من النوم
قعد علي شباكه ينده ويصيح وصاحبنا لم يقوم
فات غراب نوحي قاله : متتعبش نفسك ياأخينا
الحلو إشتري دش وكان سهران مع بنات بالكوم
عجبي !!!


مع تحياتى ابو سليمان



وقف الأتوبيس في إشارة وكأنه علبة سردين
حر وعرق وتأفف جم من كل اللي فيه واقفين
وقفت جنبه عربية فخمة فيها غندورة وكلبها
تحسس علي شعره ويطلع لسانه للبني آدمين
عجبي!!!




طالع لصلاة الفجريه قابل شباب محششة
كان مستضفهم شيطان ولا أدب ولا خشي
رمي عليهم سلام ياعم قولي سلامك لمين
بدأ يوعظهم ضربوه رجع دماغه مدشدشة
عجبي !!!


دق الجرس قال لبنته:إفتحي الباب يارنا
وإن حد سأل عليا قوليله بابايا مش هنا
حرا م عليك بقي بإديك تعلم الكدب لبنتك
ولدك زرعك راعيه بعد سنين تحصد هنا
عجبي !!!



باباه باس مامته سألهم بتعملوا أيه؟
قالتله: بحط قطرة لبابا عشان عنيه
شاف الشغالة قال:سلامتك سألته ليه؟
قالها:بابا حطلها قطرة روحي اسأليه
عجبي !!!



اتنين اصحاب دفعة واحدة نفس المؤهل اتوظفوا
كل واحد فـ وزارة غير التاني بالميري اتشرفوا
عارفين دخل كل واحد من شغلته اللي إشتغلها كام؟
واحد ألفين والتاني ميتين وسببه ايه؟! ولا يعرفوا
عجبي !!!


كسر الإشارة إعترضه عسكري شطور
شتم العسكري وقال نازل كمان بيثور
سعادة البيه طلع كرنيه العسكري شافه
عرق وقال: آسف ياسعادة مدير المرور
عجبي !!!



فلوس كتير ع النضافة بتنصرف
وهي ساعات ونرجع تاني للقرف
لوبس ننضف جوانا قبل الشوارع
كان كل واحد علق وسام الشرف
عجبي !!!



من حقك تحزن ياقلبي ومن حق تبكي ياعنية
بعد ضياع كل المرتب عالدروس الخصوصية
والعيال اهم جايبين حاجة وتسعين ولم طالوا
هندسة أوطب وطلبين وسطه لشرطة وحربية
عجبي !!!